قصة

الجزء الثاني


أبو راشد : هلا والله هلا بنور البيت
مشاري : احم احم نحن هنا
راشد :مشاري أنت ما سمعت باللي يقول إذا حظر الماء بطل التيمم
نجلاء :أعوذ بالله من الغيرة طلعت بليس من الجنة
مشعل: إلا أقول يبه وش إخبار عمي سليمان
أبو راشد :الحمد الله أحسن من أول
أم راشد :إلا يا أبو راشد ورى ما تعزم أخوك
نجلاء :إيه يا بابا الله يخليك أبي أتعرف على العنود أكثر أحس أنها حبوبه
مشاري وهو يتهزى بنجلاء:أي بابا الله يخليك أبي أتعرف على الشباب
أبو راشد : تم مدام شيخه البنات قالت بعزمهم نعزمهم
*********************

ابوفهد: ياوليدي انت حاط عينك على احد ..قلي ياوليدي وابشر .
فيصل : لا مافيه احد معين ...بس يبه أنا الحين ما استعديت للزواج
أبو فهد : بس يا وليدي هاذي بنت عمك وماابيها تروح لغيرك وبعدين ابي علاقتي تقوا مع اخوي ..
فيصل :خلاص إلي تشوفه ..
أبو فهد :والله يا ولدي ضني فيك ما خاب وانا عارف انك منت رادني.
وييقطع عليهم صوت جوال أبو فهد
أبو فهد الطيب عند ذكره:الو السلام عليكم
أبو راشد : وعليكم السلام ها وش أخبارك اليوم
أبو فهد :والله الحمد الله أحسن ..
أبو راشد : والله يا وخيي داقن اعزمكم بكرة على العشاء كان ما عندكم شي
أبو فهد: إلا ورى موب انتم اللي تجوون عندنا
أبو راشد :والله مافي فرق عندنا واللي عندك بس ذي المرة أنا والمرة الجايه أنتم .
أبو فهد :خلاص اجل بكرة بعد الصلاة العشاء أنا عندكم ..

********************
أم فهد : إلا اجل وين رجلك.. ورى ما جاء معك ..
لمى : عنده شغل ..
فيصل : هلا والله لمى
لمى:هلا فيك ..وشلونك..
فيصل:يسرك الحال ..الاوين القمر ماشوفها..
لمى تأشر لفيصل ...
فيصل وهو يلتفت على ورى وشاف نجود. : هلا والله .. هلا بقمرهم .. وشلونك .
نجود : أنا طيبه ..
ونزل نجود وجلس مع أمه ولمى ..
نجود تمسك فيصل مع يده وتسحبه : خالي فصول تعال أبيك شوي ..
لمى : نجيد خليه يجلس معنا ..
فيصل : ما عليك منها ... يالله نجود ..
فواز: الله يافيصل لو تحبني ربع حبك لذا البزر ...
فيصل :والله عشنا وشفنا تقارن نفسك فيها..
نجود:خالو ياللــــــــه..
*************************

نوف : والله ما تدرين يا سارة وش قد مشتاقه له ..
ساره :مسكينة يا نوف أنتي تشتاقين وهو نايم في العسل ..
نوف :وهذا إلي ذابحني ..
ساره : من زمان وأنا أقولك بيني له..
نوف : صعبه أقول له تعال يا فيصل أنا احبك ..
ساره : خليك كذا..تقولي صعبه لحد ما تاخذه غيرك ..
نوف : فيصل ياخذ غيري .. لا ما تسويها خالتي ..
ساره : وليش ما تسويها ..
نوف : أقول ساره أكلمك بعدين أمي تبيني ..

************************

نجلاء : يالله عبير بسرعه ايش رايك .. الاحمر والا الوردي ..
عبير : والله مدري كلها حلوه .. وانتي ما شاء الله كل شي يطلع عليك حلو ..
نجلاء :يااالله يا عبير صار لك ساعتين وانتي تقولين نفس الكلام ...
عبير :ههههههههه ..طيب وش اسوي لك البسي اللي تبين..
نجلاء : خلاص راح البس الوردي..

****************************

أبو راشد : يا حياالله من جانا تو ما أنور البيت ..
أبو فهد : الله يحيك البيت منور بهله ..
أبو راشد : والله العيال كبروا اجل من يصدق إن فيصل ومشعل ذولي هم نفسهم اللي كانوا يتطاقون وهم صغار ..
ابوفهد: ايه والله 15 سنه مهيب سهله ..
أبو راشد: ايه والله صدقت ...

***************************

فواز : إلا أقول يا مشاري ما تشوف اليوم فيصل كاشخ كأنه معرس ...
فيصل: اصلاً أنا من يومي كشخه ..
فواز : لا بس اليوم غير ..
مشاري : ها فيصل اعترف وش عندك ...
مشعل : ما أردى منك إلا هو .. وش عليكم منه ..
فيصل : ايه والله الله يخليك فكني منهم ..
مشعل : لا عاد مشاري ولقى له خوي الله يعينا ..
فواز : أقول مشاري كنا انسبينا ..
مشاري : يا شيخ روح هاذولي لو يطيرون ما قوونا ..
مشعل : الله يعين شكلهم انقلبوا علينا .

************************
رغد : يا الله شوفي وشلون تتكلم .. مغروره بشكل .
لمى : هههه حرام عليك
رغد : ولي قاهرني أنا وهي في بيت واحد بنكون..
لمى : والله شكلها حبوبه .. ياحظ اخوي فيها والله تهبل ...
رغد : اووف فيصل وهضمناه لكن هو ونجلاء أعوذ بالله ..
لمى : وجع هذا وهو أخوك ..والله فيصل مافيه مثله ..
أم راشد : إلا وشلونك يا لمى مع الحمل عسى ما أتعبك ..
لمى : الحمد لله أحس انه أهون من حملي بنواف ..
العنود : وش ناويه تسمينه ..
أم فهد : بدري تو الناس خليها تولد أول بالسلامه ..
لمى : والله إذا بنت بسميها نجلاء لعل وعسى تصير مثل نجلاء تهبل.. وإذا ولد أكيد فيصل على اخوي ..
نجلاء : مشكوره حبيبتي إذا أمها لمى أكيد بتصير حلوه ..
الهنوف تهمس لخالتها : والله يا خالتي نجلاء تستاهل عسى يكون فيه نصيب .
ام فهد : إن شاء الله .. يارب الله يسمع منك..

*******************************

ابوفهد : والله ما ادري وشلون افاتحك بالموضوع ..
ابو راشد : تفضل .
أبو فهد :والله يا ابو راشد أنا ما اعرف للمقدمات ..وبقول لك الموضوع على طول ..ابي اخطب نجلاء لولدي فيصل .. ها وش قلت ..
ابو راشد : والله فيصل رجال ينشد به الظهر ..بس لازم نشاور نجلاء ..
ابو فهد :خذ راحتك ..والله يكتب اللي فيه خير ..
فواز : فيـــــــــــــــــصل .. فيصل .. فيــــــــــــصل ....
فيصل : خير وش فيك تصارخ .. فجرت أذني ..
مشاري :واضح من الصبح وهو ينادي .. الي ماخذ عقلك ..
فواز : أنا قايل الرجال اليوم مو طبيعي .. وش فيك .
فهد : أنت وش فيك عليه .. خله في حاله لا يقلب عليك وأنت تعرف فيصل إذا قلب ..
راشد : اجل تخوف يا فيصل ..
فيصل : وش دعوه .. واحد يقول تخوف والثاني يقول إلي ما خذ عقلك والثالث يقول أنت مو طبيعي إلا أقول كيف الحال ..
أبو فهد :يالله مشينا يا عيال ..
أبو راشد : وين تو الناس ..
أبو فهد : والله مجلسك ما ينمل بس تعرف بكره جمعه وأنا ما أحب السهر ..
فهد : تامر شي ياعمي ..
أبو راشد : سلامتك ..
مشعل : أجل اجلسوا يا عيال تو الناس بدري ..
فيصل : لا وش نجلس يالله مشينا .
فواز : أنا أقول مو طبيعي بس انتم ما تصدقون ... يؤ يؤ أبوي راح من أروح معه ..
فيصل : تعال معي فسيارتي ..
فواز : أح اح ...
فيصل : يالله في أمان الله ..
راشد : في أمان الكريم ..

*****************************

نجلاء : والله بنات عمي ينحبون .. ويدخلون القلب على طول ..
عبير : ايه والله
ام راشد : أنا أعجبتني رغد ..
نجلاء :---------------
عبير : ايه مره حلوه باين انه رزه وتحب الكشخه ....

****************************

فيصل :ألحين ما تقولي وش ذا التعليقات السخيفه ...
فواز : أنا ... وش قلت ما قلت شي ..
فيصل : فواز ..
فواز : وش تبي يا أخ فيصل ...
فيصل : فواز انزل بسرعه ..
فواز :----------------
فيصل : انزل بسرعه ..
فواز : مهبول أنت انزل في نص الشارع حرام عليك ياخي ما تسوى كلمه قلناها خلاص أنت طبيعي اليوم وأنت ماكشخت ولا أنت معرس وش تبي بعد ...
فيصل: فواز الحين عرفت انزل..
فواز : خلاص خلاص يا جعل نجلاء توافق تتزوجك ..
فيصل في نفسه اسم يبشر ببدايه حلوه ..
فواز : وين سرحان يا أبو الشباب ...
فيصل : أقول ممكن تقدر تمسك لسانك لين نروح البيت ..
فواز : أحاول بس ما أوعدك ..
فيصل :ههههههههههه
فواز : إذا قلت إن محد يقدر يفهمك لا احد يلومني ..

******************************

أبو راشد : السلام عليكم .. وش أخبار ضيوفكم ...
أم راشد : وعليكم السلام .. ما عليهم والله...
أبو راشد : إلا أقول يا أم راشد .. ..
أم راشد : خير إن شاء الله ..
أبو راشد : خير ..اليوم أبو فهد فتح معي موضوع ..
كان يبي نجلاء لفيصل ..وش قلتي .
أم راشد : والله أنت تعرف فيصل أكثر مني وأهله ناس أجاويد ..
أبو راشد : والله فيصل رجال والنعم فيه ...
أم راشد :بس مدري عن نجلاء..
ابو راشد:شاوريها وشوفي وش تقول ...والله يكتب اللي فيه الخير..
ام راشد:ان شاء الله.

الجـــــزء الثــالــــــث
نجلاء : خلاص مها حبيبتي أكلمك بعدين .. ماما تبيني .
مها : خلاص طيب بس لا تنسين تكلمين على ابوي اعرف وش صار بالتفصيل ..
نجلاء : طيب .. يالله باي ..
أم راشد : عساك أستانستي مع بنات عمك ..
نجلاء : إيه والله مره أستانست ..

------------------------

فواز : ها وش أخبار العروس ..
فيصل : أنت خلهم يوافقون بعدين قل عروس ..
العنود : والله أنها حبوبه وطيوبه وعساها توافق لأني حبيتها يا بختك يا فيصل فيها .
رغد : أعوذ بالله لا تذكريني فيها هالمغروره ..
فواز : وليش مغروره ..
فيصل : أنت ما تلاحظ انك داخل عرض .. من اللي المفروض يسأل أنـــــــا ولا انــــــت ..
رغد : أعوذ بالله على ايش شايفه نفسها ما ادري ..
العنود : الصراحه يا رغد يحق لها تشوف نفسها ..
فواز:تخافين تاكل عليك الجو...ها تغارين منها.
رغد : أنا هذا الناقص..انا وش جلسني معكم أقوم أحسن لي ..

-------------------------

أم راشد : ها يا بنيتي وش قلتي ..
نجلاء : طيب بابا ايش رايه ..
أم راشد :والله أبوك فرحان ويقول فيصل رجال ينشد به الظهر .. بس القرار الأول والأخير لك ..
نجلاء : والله محتاره ... أنتي وش رايك ..
أم راشد : والله أنا مرتاحه لها ... وبعدين ما شاء الله أمه تنحط على الجرح يبرئ ..
نجلاء : --------------
أم راشد : لا تستعجلين .. فكري .
وقامت أم راشد علشان تطلع ....
نجلاء : ماما ..
أم راشد :نعم ..
نجلاء : الشور شوركم .. اللي تشوفينه أنتي وبابا سووه ..
أم راشد : لا تستعجلين خذي وقتك هذا زواج ..

-----------------------

بعد يومين .....
فيصل : السلام عليكم ..
أم فهد وفهد وفواز : وعليكم السلام ..
فهد : عالبركه مبــــــروك .. مبــــــــــــروك ..
فيصل : الله يبارك فيك .. بس على أيش ..
فواز : مبـــــــــــــــــــروك منك المال ومنها العيال ..
أم فهد : عمك اليوم الصبح كلم على أبوك وقال له أنهم وافقوا ..


-----------------------

مشاري : ألحين فهمت ليش فيصل مكشخ ذاك اليوم لا وفواز يقول كنك معرس أثره معرس صدق ..
أبو راشد : وين يا نجلاء ..
نجلاء : بروح لغرفتي ..
مشاري : أيـــــــــــــــــوه على اللي تستحي والله حركات ..
أبو راشد : ألحين ورى ما تترك اختك في حالها .. على فكره يا عيال ترى العشاء يوم الخميس عند أخوي سليمان وكلنا بنروح ..
مشعل : أنا منيب رايح عندي شغل ..
أبو راشد : مافيه شي أسمه منيب رايح أنا قلت كلنا بنروح ..
مشعل : بس يبـ......
أبو راشد يقطع عليه: أنا قلت كلنا يعني كلنا .. ما أبي كلام زياده ..

----------------------

أم محمد : على البركه خطبة فيصل ..
لمى : الله يبارك فيك ..
نوف وهي مصدومه : فيـــــصل .. خطب ..
لمى : إيه خطب نجلاء بنت عمي عبد الله ..
نوف : بنت عمــك عبدالــــــله ..غريبه؟
لمى :ليه هي بنت عمه.. بعدين علاقة أبوي وعمي صارت أقوا بكثير عن أول من ارجعوا لرياض ..
الهنوف : بس ما شاء الله عرف عمي من يختار الله يوفقهم ..
أم محمد : أي والله فيصل يستاهل ..
نوف : أنا بروح أبارك لرغد ..

--------------------------

مشعل : هلا والله وغلا .. بعمري وروحي وقلبي و حياتي كلها ..
غدير : هلا بك .. هلا حبيبي .. يا الله ما تدري يا مشعل قد أيش مشتاقتلك ..
مشعل : وأنا أكثر .. بس معليش حياتي أنا ما أقدر أجي يوم الخميس ..
غدير : ليه يا عمري أنا أنتظر يوم الخميس بفارغ الصبر وأنت بكل سهوله جاي تقولي ( وتقلد صوته ) ما أقدر أجي ..
مشعل : ههههه طيب يا حياتي أنا وش أسوي والله عندي ظروف ما أقدر أجي ..
غدير: بس أنا مشتاقتلك ..
مشعل : وأنا بعد مشتاق لك .. بس أوعدك أني راح أعوضك ..
غدير بدلع : وعد ...
مشعل : وعد يا أحلى وأغلى غدير ..

-------------------------

نوف : هلا والله رغد .. كيف الحال .
رغد : الحمد الله .. أنتي وش أخبارك .
نوف : الحمد الله .. إلا صدق اللي سمعته ..
رغد : وإيش هو اللي سمعتيه ..
نوف : أن فيصل خطب بنت عمك ..
رغد من غير نفس : إيه صدق ..
نوف : وليه تقولينها من غير نفس ..
رغد : لأني بصراحه ما أحبها يا الله يا نوف لو تشوفينها .. مغروره بشكل ..
فيصل : من هذي اللي مغروره ..
رغد وهي مرتبكه : لا هذي وحده معنا في الجامعه ..
فيصل : الحين أنتي ورى ما تتركين عنك الكلام الفاضي وتقومين وتساعدين أمي لأن بكره بيجي عمي وعياله ..
رغد : تبيني أنا رغد بنت سليمان أنزل للمطبخ .. والشغالات وش يسوون ..
فيصل : رغد بنت سليمان بكره راح يجي من يتزوجها وتدخل للمطبخ ..
رغد : أنا اللي يتزوجني يا إما يجيب لي طباخ ولا ما أبيه .. ليه أنت ناوي تخلي نجلاء تدخل للمطبخ ..
فيصل : إيه تدخل وليه ما تدخل ..
رغد : كيفك خل زوجتك المطبخ لكن أنا لا .........سوري حبيبتي تأخرت عليك ..

--------------------------

يوم العزيمه في بيت أبو راشد ......
مشعل : يله يا نجلاء بسرعه الساعه 8 تأخرنا .
مشاري : هي بالعاده آخر من يخلص فما بالك وهي عروس ..
أم راشد : أنا بروح أناديها ... واسكتوا لا تسمعكم تراها ياله وافقت ..
نجلاء وهي نازله مع الدرج : أعوذ بالله مزعجين هذاني جيت ..
مشاري يصفر : الـــــــــلـــــــــه يا نجلاء وش هالكشخه .. الصراحه يا بخت فيصل فيك ..
مشعل : ما شاء الله يا نجلاء تهبلين ..
نجلاء : مشكورين لا داعي لا داعي ..
مشاري : يا لله ياليـــــــــتنا ما قلنا شئ بلش شغل الغرور ..
أم راشد : يا لله عن الكلام الفاضي ... أبوكم برى يستنانا ..

------------------------

فيصل : فواز قوم جيب الدخون ..
فواز : شوي ... شوي .....
فيصل بصوت حاد : فـــــــواز ..
فواز : طيب .. طيب ..
----------
أم فهد : إلا أقول يا الهنوف قلتي لمك تجي ..
الهنوف : إيه قلت لها راح تجي هي ونوف مع لمى ومحمد .. .. .. تبين شي خالتي بروح لشهد ..
أم فهد : لا سلامتك هذي العنود نزلت ..
فواز : العنود .. روحي جيبي الدخون ..
العنود : أمشي على طول بعدين يمين تلقى المطبخ قل لهم يعطونك إياه ويجيبون لي مويه ..
فواز: وليه أنتي ما تروحين تجيبينه ..
العنود : بعدين تتوصخ ملابسي ..
أم فهد : أنا بروح أجيبه ..
فواز : الله يا أم فهد وش ذا الكشخه .. الظاهر أنتي وفيصل تحسبون اليوم العرس .. وهو الثاني هناك متكشخ ..
فيصل : فواز وين الدخون ..
فواز : العنود وين الدخون ..
العنود : يمه وين الدخون ..
فيصل: وأنت يا أخي الواحد ما يقدر يعتمد عليك في شي ..
العنود :إيه والله انك صادق ..
فيصل : ولا عاد أنتي الثانيه..
فواز : إلا أقول يا أخ فيصل وش جاك على ذا الكشخه اليوم ..مصدق أنك معرس ..
فيصل : تصدق عاد إنك فاضي وأنا إلي مصدق عمري جالس ساعه أتجادل معك .. وأنتي الثانيه قومي جيبي الدخون ..
العنود:طيب ماري..مااااااااااري .
فيصل:خير ان شاء الله انا قلت انتي ماقلت ماري ..روحي جبيه بسررررعه.
العنود : أووف ... طيب ..
فيصل : وأنت ألحقني به في المجلس ..
فواز : وهو لازم يعني .. استناه وخذه معك اشتغل عندك انا..
فيصل وهو يصرخ : فــــــــــــــواز والله العظيم إذا ما لحقتني به ..والله إن تندم ..
وطلع وهو معصب ....
أم راشد : هلا فيصل ..
فيصل من غير نفس : هلا فيك ..
أم راشد : وشلونك .. وشلون الوالد ..
فيصل : بخير أنتم وشلونكم ..
وراح وخلاهم قبل ما يسمع الرد ..
عبير : وش رايك يا نجلاء في زوج المستقبل..
نجلاء : حلو...... بس يخوف يمه عصبي ..
عبير : ههههههه ليه كل ذا ..
نجلاء : أنتي ما شفتي وشلون كان يتوعد أخوه .. ووشلون سلم على أمي ..
عبير : مو شرط .. يمكن أخوه مسوي شي نرفزه ..
نجلاء : -------------
عبير : الله يوفقك ..
نجلاء : آمين يا رب ..

---------------------------

فيصل في غرفته فوق السرير يا الله أنا وش ألي بلاني في هالزواج وخلاني أتسرع في الموافقه .. حتى قبل ما اسأل عن البنت وأعرف أخلاقها وطبايعها بس أمي مستحيل توافق عليها إلا إذا كانت أخلاقها زينه بس رغد تقول مغروره وأكيد بعد بتكون دلوعه لأنها البنت الوحيده عند عمي ..
العنود .. احم .. احم ..
فيصل : هههههه بسم الله متى دخلتي ..
العنود : من زمــــــــــــــان ... وش تفكر فيه ..
فيصل : أم .....أم...... فيك ..
العنود : ههههه طيب أبوي يبيك تحت ...
فيصل : إن شاء الله .. بس وش يبي ؟
العنود:عادي مايبي شى ..بس هو مايعجبه المكان الا اذا انت فيه..
فيصل :اكيد فيه مكان يحلى بدوني..
العنود:مشكلتك الثقه العمياء يافيصل وتركض قبل لاتسمع رده..

-----------------------

أم راشد : وش فيك تعوذي من الشيطان ..
نجلاء : هونت ما أبي أتزوج .. ما أبي فيصل ..
أم راشد : ليه ..
نجلاء : -------------
أم راشد : ما تبينه ليه .. الرجال ما فيه شي يعيبه ..
نجلاء : ما أدري أحس أنه إنسان عصبي ولا يعرف يتعامل مع أحد وهمه نفسه وبس ..
أم راشد : كل ذا صار فيه وش دراك أنتي عنه .. وأنتي عمرك ما جلستي معه .. وبعدين اللي يسمع كلامك يقول .. أنه بيقومك بكف وبينومك بكف ..
نجلاء : ماما بس هو عصبي مره ..
أم راشد : وإذا كان عصبي يعني .. بعدين شوفي وشلون خواته يحبونه ..
نجلاء : وش عرفك ..
أم راشد : شوفي لمى من كثر ما تحبه بتسمي ولدها عليه .. وأبوك يمدح فيه وإخوانك .. وبعدين حنا ما وافقنا عليه إلا وحنا عارفين الولد زين ..
نجلاء : بس أنا خايفه ..
أم راشد : شي طبيعي تخافين لأنه شي جديد عليك .. وكل بنت مثلك في الأول تكون خايفه ومتردده ..

----------------------------

الهنوف : إلا أقول يا رغد وش راح تلبسين في ملكة فيصل ...
رغد : بلبس الأحمر ..
لمى : لا حرام تلبسين الأحمر .. ألبسي الأسود..
العنود : ليش من اللي بيجي ..
لمى : بس حنا وأم عبير وخواتها ..
الهنوف : يعني ما راح يجي أحد أجل أبلبس حق العيد ..
العنود وهي معقده حواجبها : طيب وأنا وش ألبس ..
لمى : وش تلبسين؟! البسي الفستان الجديد.

---------------------------

وليد : هلا والله يا بو الشباب ..
فيصل من غير نفس : هلا بك ..
وليد : وليه تقولها من غير نفس ...
فيصل : يا أخي الملكه بكره ...
وليد : وإذا الملكه بكره .. أنا اعرف إن اللي بيملك يكون فرحان ومبسوط مهوب مكشر ...
فيصل : يا أخي أحس عمري مبتلش بذا الزواج ..
وليد : طيب وش ناوي تسوي ..
فيصل : والله ما ادري بس أحس ودي افركش الزواج ..
وليد : صاحي أنت .. هذي بنت عمك وش بيقولون الناس ..
فيصل : وإذا بنت عمي أعذب عمري عشانها ..
وليد:وبعدين لا تنسى أبوك ..
فيصل:هذا اللي ذابحني مابي ازعله...
وليد : أقول تعوذ من الشيطان .. ويا الله قم بس عن الكلام اللي لا يودي ولا يجيب ..

-----------------------------

ساره : نوف حبيبتي يكفي دموع ..
نوف :ساره اليوم ملكته .. تعرفين وشلون اليوم ملكته ..
ساره : أنا قايله من الأول لك أنتي اللي ما ...........
نوف تقاطع ساره : أنا اللي ما صارحته بحبي مليت وأنا أسمعها منك ..
ساره : الله وأكبر .. اللي خلق فيصل ما خلق غيره ..
نوف : فيصل غير ما فيه مثله ...
ساره : بتروحين اليوم ..
نوف : أكيد لا ..
ساره : ليه....
نوف : لأن الملكه في بيت عمهم ..
ساره : اهــــــــا ...
نوف :والله لو تشوفين نجلاء هذي وع مقرفه بشكل ..
ساره : هههههههه وش عرفك أنتي ...
نوف : شفتها في بيت خالتي مره وبعدين هي معنا في الجامعه ..
ساره : والله هي معنا في الجامعه ..
نوف : إيه والله وهذا اللي ذابحني ..
ساره : ولا يهمك ما عاش اللي يذبحك .. وأنا اعرف وشلون أنتقم لك منها ...


الردود ياجماعه وتوقعاتكم

أتمنى أنها أعجبتكم

شكراً واكيد اعجبتنا